هل ترغب بشراء سيارة؟ اليك بعض النصائح التي تفيدك!
مساء الخير حبايبي
اليوم رح احكي عن السيارات والشراء بالسويد لانو كتير ناس ما بتعرف بهي الامور ولهيك حبيت احكي عن هلموضوع حتى اعطيكم شوية تفاصيل تفيدكم وتحطوها ببالكم وهي نتيجة تجربة شخصية ورؤية قريبة للسوق والسائقين واوضاع البلد والطرقات!
الشي الاول قبل شراء السيارة شو حاجتك للسيارة وليش بدك سيارة؟ حتى تقدر تقدر حجم السيارة ومواصفاتها المطلوبة
الشي الثاني اذا انت بتشتغل ومكان شغلك بعيد عن بيتك هي نقطة مهمة لازم تفكر فيها وهي مصروف الوقود وصدقوني
بتفرق كتير معكم هي الامور وما بتحسو فيها لتشترو سيارة وتسوقوها وقتها يا بتندمو يا بترتاحو وبتنبسطو من اختياركم !
الشي الثالث هو مكان اقامتك وسكنك ومنطقتك الي غالباً رح تسوق سيارتك فيها هاد موضوع مش مهم كتير ولكن رح اذكر بعض التفاصيل الي ممكن تسهل عليكم وتقلل التكلفة والصيانات وغيرها
الشي الرابع كيف نشتري سيارة وكيف نعرف انو السيارة منيحة ومناسبة النا ومنين نشتريها وكيف الدفع وترتيب الامور المالية حسب ميزانية كل شخص
الشي الخامس لازم تخلي ببالك انو بالسويد مافي سرعات عالية واقصى سرعة هي 120 كلم في الساعة وهاد الشي عم يروح عن بال كتير ناس وعم يشترو سيارات محركها كبير بتهلك بمصروف البنزين وبدها نص راتب شهرياً على مشاوير تعتبر قليلة وعادية يعني, اعطيكم مثال بين شخص بيروح من هلسنبوري الى ستوكهولم واحد محرك سيارته صغير بيدفع 700 كرون ليوصل لستوكهولم واحد محرك سيارته كبير بيدفع 1500 كرون ليروح لستوكهولم ويمكن اكتر حسب حجم محرك سيارته , هي مقارنة بسيطة ولاحظو الفرق واضح وهو اذا ماكان ضعف المبلغ رح يكون نصف الضعف على الاقل
المواصفات المطلوبة للسيارة!
اذا كان عندك عيلة رح تحتاج سيارة كبيرة فيها مقاعد تكفي الافراد الي رح يركبو بالسيارة
بالسويد متل ما قلنا مافي سرعات عالية وانا اشوف ان السيارات الي محركها يزيد عن 1.6 ماهي بهي الاهمية القصوى ولذلك انصح الي بده يشتري سيارة يشتريها يكون محركها 1.6 فقط لانو مش بحاجة اكتر من هيك
بتكون مصروف الوقود فيها مناسب وما بيوجع القلب والجيبة هي نقطة مهمة ما بتحسو فيها لتجيبو سيارة خاصة الي بيطلع على شغلو بالسيارة وعندو استخدام كتير للسيارة
كيف فيك توفر صيانات للسيارة؟ ببساطة حافظ على صيانة السيارة السنوية هيك بتتفادى الاعطال ولا تعمل صيانة الا بمركز صيانة معتمد متل ميكونومين وهي الشركات الكبيرة لانو نسبة الخطأ عندهم تعتبر صفر
واذا في مشكلة تقدر تراجعهم وغير هيك اغلبهم بيعطوك ميزات حلوة لما تعمل صيانة دورية عندهم يعني سيرفس للسيارة ولا تسترخص وتقول بلاقي عند فلان بأرخص !
وساوي دائماً سيرفس وصيانة كاملة لتبديل الفلاتر والزيوت لو دفعت 5000 كرون بس انت عم تحافظ على سيارتك وتقلل نسبة حدوث الاعطال وبالنهاية هي امان الك وللعائلة
دواليب سيارتك! انا افضل انو يتم استخدام دواليب شتوية ممسمرة بالشتاء ودواليب صيفية بالصيف
هي الطريقة للناس الكسولة الي متلي انا ما بحب بدل بس بنفس الوقت انا بالجنوب ماعندي تلج بشكل دائم ومابحاجة دواليب ممسمرة لانو مش ساكن بمنطقة تحتاج هاد الشي
هلق نجي لشراء السيارة كيف ومنين؟
وانا انصح بالشراء من شركات ومعارض الها اسمها ومعروفة حتى تكون اموركم بالسليم وطبعاً الضامن الله ولكن نحن ناخد افضل الخيارات
شراء السيارة يعتمد على الميزانية وانا عن نفسي افضل اخد سيارة تكون حديثة نوعاً ما لعدة اسباب
اولها انو السيارة ما بتكون ماشية كتير اذا رح اخد سيارة مستعملة وبتكون موديل سنة قريبة من السنة الحالية حتى لو اضريت بيعها بيكون حقها فيها وبنفس الوقت اذا مابدي بيع بكون راكب سيارة منيحة
الي عنده عقد عمل وصارله عم يشتغل اكتر من سنتين انا انصحه ياخد سيارة بالتقسيط اذا ماعنده قدرة يدفع حقها كامل وبياخد سيارة كويسة بحدود 100 الى 120 الف كرون بأقساط شهرية مناسبة ما تتعدى 2000 كرون بالشهر طبعا هي مناسبة للي عنده دخل مناسب وبيقدر يسد القسط بدون تأثير على نمط عيشته وحياته
للعلم بس في سيارات جديدة كمان بأسعار حلوة ما بتتعدى 200 الف ولذلك لا تخلو عينكم بس علمستعمل اذا اموركم المادية بتسمح
الي ماعنده شغل بيقدر ياخد سيارة بحدود 20 الى 30 الف ولكن يدور على امور مهمة لا يدور على الرخص بس لانو الشي الرخيص قولاً واحداً في مشاكل والا ماكان نباع برخيص
فكر بالتالي لما بدك تشتري سيارة مستعملة
محرك السيارة يكون صغير ما يتجاوز 1.6 حتى تخفف مصروف وقود
بميكانيكي وتجربة السيارة بالطريق والسياقة بمختلف السرعات وايضاً انصح انو يتم عمل فحص للسيارة بيسيكنينغ لو دفعتو 500 كرون بس بتكونو عملتو فحص للسيارة الي رح تركبوها للامان
تأكد من دفتر صيانة السيارة الدورية وتأكد من وجود اختام عليه بمراكز معتمدة , اي كتابات لا يوجد معها ختم معناها ماتمت او تمت على ايد شخص خاص واذا ماكان في ختم السيارة تفقد من سعرها وتفقد الكفالة تبعتها ومالكم مصلحة فيها
تفقد الدواليب وعمق التخاريم حتى لا تتورط بشراء دواليب جديدة بعد شراء السيارة
تفقد نظافة السيارة الداخلية والخارجية ودقق النظر في الهيكل الخارجي
تفقد نظافة المحرك والا يكون عليه زيوت تغطيه لازم يكون نضيف
تفقد من الاضاءة الداخلية والخارجية للسيارة
سوق السيارة واطلع فيها بالطرقات واسمع اذا فيه اي اصوات او صرير في مختلف الاوضاع وبشكل خاص عند المنعطفات الحادة وتأكد من ثباتها على الطريق ولا يوجد اي اصوات تصدر منها ومن سلاسة سياقتها
عند تبديل الغيارات سواء بالاوتوماتيك او العادي اسمع جيداً اذا فيه اصوات او تأخر في تقلي الغيار التالي
بعد سياقة السيارة لعدة كيلو مترات وعند ايقافها لا تتطفئها وانتظر وراقب درجة حرارة السيارة اذا كانت مستقرة او ترتفع
انصح وبشدة شراء سيارة بجنزير صدر وليس قشاط
هي الامور بيساويها شخص فاهم بالسيارات اذا بتعرفو حدى خدوه وعطوه 500 كرون وهو بيتكفل بالباقي وبيفحصها
ممكن البحث عن السيارات من خلال الزيارة المباشرة للمعارض او من خلال البحث على موقع بلوكيت وهو الاشهر
الي عندو استفسار يكتب على مجموعة الفيس بوك والي بقدر جاوب عليه بجاوب ان شاء الله ضمن معرفتي